يئني قاپی ديل-دوشونج
کومپلئکس‌لیک‌لر(۱۵)
یئر آدلاریندا، ساواددان تاپیلمیش کومپلئکس‌لیک
مییانالی‌لار یاخشی بیلرلر، بو شهرین آدی‌نین قاباقکی رسمی یازی فورماسی «میانج» ایدی.
آشاغیدا ایکی اؤرنک‌له موعیّن آدلارین ایکی‌جور دَییشیلمه‌سینی گؤروروک. دیلیمیزده بو سایاق کومپلئکس‌لیگین یارانماسی آنجاق ساوادین چوخلوغوندان تاپیلیبدیر:
۱. «میانه» نه‌دن «میانج» اولدو؟
۲. «درین دره» نه‌دن «درین درق» اولدو؟
میانه‌نین «میانج» اولدوغونا تای، آشاغیدا نئچه باشقا تانینمیش آدلاری دا سوزوروک:
(دیزه) دیزج
(ساوه) ساوج
(آوه) آوج
(هیده) هیدج
(میانه) میانج
بو دَییشمه‌لرین نه‌دنی:
عربجه‌ده ایسم‌لرین سونوندا «ـه» حرفی گلرسه او ایسم مؤنث سانیلار. اوسته‌کی آدلار دا «ـه» حرفینده بیتدیکده آما مؤنث اولا بیلمزلر. اونا گؤره، ساوادلی‌لارین [آللاه قویسا] درین ساوادلاری اولدوغو اوچون، «ـه» حرفی‌نین یئرینه «ج» حرفی قویوبلار آنجاق مؤنث سانیلماسین دئیه.
ایندیکی أن تانینمیش بو کیمی سؤزجوک‌لردن [فارسجادان عربجه‌یه گئتمیش] «برنامه» سؤزجوگو دیر کی عربجه‌ده «برنامج» یازیلیب و اوخونور:
(برنامه) «برنامج»
عئینی کیمی، آشاغیداکی آدلاری دا، بئله‌جه دَییشدیکده آنجاق باشقا بیر فورمادان فایدالانیبلار؛ بو یول «ج» حرفی‌نین یئرینه «ق» حرفیندن فایدالاندیقدا سؤزجوک‌لرین مؤنث سانیلماسی‌نین قاباغینی آلیبلار:
(درین دره) «درین درق»
(بَنَش دره) «بنفشه درق»
(قره تَوَره) «قره طَوَرق»
(تاوا [تاوه]) «طَوَق»
بونلار آیدینلانمالی دیرلار!
بونلار دیلیمیزده تیکان کیمی بیتمیش، ائله‌جه ده، گرگین‌لیک گتیرن کومپلئکس‌لیک‌لردن دیرلر.
ناصر منظوری
