يئني قاپی ديل-دوشونج
Yazını bu əlifbada oxuyun: TÜRKCƏ
کومپلئکسلیکلر(۱۳)
بیرینجی اؤرنک (منفی قۇرۇلوش):
نه دانیشدی نه قۇلاق آسدی!
(دانیشمادی دا قۇلاق آسمادی دا!)
(ایندییهجن باشقا دیللردن [فرانسیزدان، عربجهدن، رۇسجادان . . .] دیلیمیزه آلینمیش نئچه کومپلئکسلیکلردن دانیشیلدی. ایندیسه، فارس اۆلگۆسۆندن آلینمیش بیر کومپلئکسلیگه توخانیریق.)
باشلیقداکی جۆملهیه باخدیقدا، اونۇن باشبۆتؤو فارس قایداسیندان آلینماسینا هئچبیر شۆبهه قالمیر.
هامیلیغا بیلدیگیمیز کیمی، تۆرکجهده، «نه» سؤزجۆگۆ «نفی» و «منفیلیک» آنلامی داشیمیر! (اصلینده، بۇ سؤزجۆکده «ۇجۇد» و «ایثبات» آنلامی وار دیر. حتّا، یۇنانجادا دا «نه» سؤزجۆگۆ «بلی» آنلامیندا دیر آنجاق مۆعیّن نهدنلردن آسیلی باشقا هیندـاۇرۇپا دیللرده «نفی» آنلامیندا ایشلهنیر!)
«نه» سؤزجۆگۆنۆن تۆرکجهده اصیل آنلامیلا یاناشی بئلهجه «نفی» آنلامیندا ایشلنمهسی، بۇ سؤزجۆگه ایکیلی بیر آنلام یۆکلهمک، ائلهجه ده، دیلیمیزدهکی سایسیز کومپلئکسلیکلره بیرینی ده آرتیرماق دئمک دیر. اونا گؤره ده، دیلیمیزین اصیل قایداسیندا اولان قۇرۇلۇش ایشلنمهلی دیر:
دانیشمادی دا قۇلاق آسمادی دا!
داها بیر جۆمله:
نه آلمانی نه هئیوانی، هئچبیریسینی یئمیرم!
بئله اولمالی دیر:
هئچبیریسینی یئمیرم، آلمانی دا هئیوانی دا!
ایکینجی اؤرنک (مۆثبت قۇرۇلۇش):
هم دانیشدی هم قۇلاق آسدی!
(دانیشدی دا قۇلاق آسدی دا!)
منفی اؤرنکده دئییلن کیمی یۇخاریداکی مۆثبت اؤرنک ده دیلیمیزه کومپلئکسلیک آرتیرا بیلر. اونا گؤره ده، دیلیمیزین اصیل قایداسیندا اولان قۇرۇلوش ایشلنمهلی دیر:
دانیشدی دا قۇلاق آسدی دا!
