يئني قاپی ديل-دوشونج
Yazını bu əlifbada oxuyun: TÜRKCƏ
«آزارکئش» یوخسا «باز»
(کومپلئکس‌لیک‌لر ۸،۹، و ۱۰ـ‌دا فرانسیز و عربجه‌دن گتیریلمیش قایدالار اساسیندا دیلیمیزده تاپیلمیش قایدا گرگین‌لیک‌لریندن دانیشیلدی. ایندیسه، آنایین بیر کومپلئکس‌لیکدن دانیشیلاجاقدیر!)
باکی‌دا، عئلم‌لر آکادئمییاسی‌نین بیلیجی‌لریندن«آزارکئش» کیمی آنایین بیر ایصطیلاحین یارانماسی‌نین دلیلینی سوروشدوم. اونلار بو سؤزو بئله ایچ ائله‌دیلر:[روس دیلینده «سئومک» بیریسی‌نین بیریسیندن اؤترو (سئودیگی اوچون) عذاب چکمه‌سی دئمک دیر. بو اوزدن، آذربایجان‌دا «آزارکئش» ایصطلاحی بیر تیمین، بیر آکتورون طرفدارلاینا دئییلر.]
دئمه‌لی، «آزارکئش» ایصطیلاحی آشاغی پروسئسدن بارا گلیبدیر:
آنلام گؤزه‌ـ‌قایناغی: روس دیلی
سؤزجوک‌لری: فارس دیلیندن
ایشلنمه‌سی: تورک دیلینده
آزارکئش! (!azarkeş)
(«بیر تیمین/بیر آرتیست‌ین سئوه‌نی، طرفدار» آنلامیندا!)
بونا «آتاسیزـ‌آناسیزلیق» دئیه‌رلر!
روس‌لار پوزونو وئره بیلرلر،
فارس‌لار لاغا قویا بیلرلر،
تورک‌لر ده جان‌لارینی قیسیب سس‌لرینی چیخارتمازلار!
بئله‌لیک‌له ده، دیل، کرییوللانما بیر یولدا اؤز دَیَرلریندن آرینار!
کئچمیش‌لرده، «شهر قصه» آدیندا بیر تاماشا اوینامیشدیلار. او تاماشادا بیر فیل تاپیلیر. اورداکی‌لار بئله دوشونودولر کی، بو حئیوانین آرتیق اولان اعضالاری وار دیر. اونا گؤره، خورطومونو کسیب باشقا یئرینه یاپیشدیردیلار. سونرا ایسه، اوزون اولان دیش‌لرینی کسیب باشینا یاپیشدیریب بیله‌سینه بوینوز ائتدیلر، باش‌ـ‌بدنینه بویا یاخدیلار.
سونرا، هئچ‌بیر حئیوانا بنزه‌مز بو مؤوجودون آدیندا قالدیلار (آخی داها فیل اولا بیلمزدی!) آخیردا، آدینی «منوچهر» قویدولار!
ایندی، بیزلر ده، هئچ‌بیر قایدا ایله جور گلمه‌ین سؤزجوک‌لر قونداریب «ادبی دیل» بارا گتیریب آخیردا آدینی آذربایجانجا قویوروق!
باز! (!baz)
تورکجه‌ده بیرزادی قاتیجاسینا سئویب اونا آلیشان بیریسینه «باز» دئیه‌رلر!
باز سؤزجوگو ۲ فورمادا ایشلک دیر:
۱. قاتمار (یاپیشیق) قورولوش کیمی:
اویونباز
قیزباز
قوشباز
(بو فورمادا آزجا منفی‌لیک آنلامی وار دیر!)
۲. قاتماز (آیری) قورولوش کیمی: [باز اولماق]
او اوغلان بیر قیزا باز اولوبدور.
سن ده کی کیتابا بازسان!
آدام هئچ‌زادا چوخ باز اولمایا یاخشی دیر! آنجاق چوخ‌لاری تراختورا، تراختورون اویون‌لارینا باخماغا باز دیرلار! من ده بیراز بوجور زادلارا بازام!
او اوغلان دئییر: بیز هامیمیز تراختور تیمی‌نین «بازلاری»ییق!
گؤروندوگو کیمی:
باز، باز اولماق، بازلیق
دیلیمیزده حتی اینگلیسجه‌ده‌کی fan سؤزوندن چوخ چوخ گوجلو بو آنلامی، بو حیسی یئتیریر.
بو سؤزجوگو، ائله‌جه ده داشیدیغی بو آنلامی، اؤز الیمیزله آرادان آپارمامیش قورویوب ساخلایاق!
(دیلماج ۳۴، اساطیر یونانی و . . . کتاب‌لاریندا «اویون» و «بازی» سؤزلری ایضاح اولونوبلار. فارسجاداکی پسوند کیمی ایشله‌نن «ـ‌باز» أکی ده آچیقلانیبدیر کی قایناغی فارسجا دئییل [بو ایضاح، یالنیز قوشقولانان دوست‌لار اوچون دئییلیر!].
ناصر منظوری
